کوئٹہ: بلوچستان کے علاقے کاہان میں فوج کی جانب سے انٹیلی جنس کی بنیاد پر کلیئرنس آپریشن کے دوران دیسی ساختہ بم پھٹ گیا جس کے نتیجے میں ایک کیپٹن اور چار سپاہیوں سمیت پانچ فوجی جوان شہید ہوگئے۔ انٹر سروس پبلک ریلیشنز نے اپنی پریس ریلیز میں کہا کہ کیپٹن فہد کے ساتھ سرزمین کے چار دیگر بہادر بیٹوں لانس نائیک امتیاز، سپاہی اصغر، سپاہی مہران اور سپاہی شمعون نے شہادت کو گلے لگاتے ہوئے مادر وطن کے دفاع میں اپنی جانیں نچھاور کیں۔ بیان میں مزید کہا گیا کہ یہ آپریشن بلوچستان کے علاقے کاہان میں 24 دسمبر 2022 سے جاری تھا۔ اس سے قبل بلوچستان کے علاقے ژوب کے علاقے سمبازہ میں انٹیلی جنس بیسڈ آپریشن کے دوران دہشت گردوں کے ساتھ شدید فائرنگ کے تبادلے میں ایک سپاہی شہید اور دو زخمی ہوگئے۔ ایک بیان میں انٹر سروسز پبلک ریلیشنز نے کہا کہ علاقے میں گزشتہ 96 گھنٹوں سے آپریشن شروع کیا گیا تھا تاکہ دہشت گردوں کی جانب سے پاک افغان سرحد کے پار خیبر پختونخوا میں داخل ہونے اور شہریوں کو نشانہ بنانے کے لیے چند مشتبہ راستوں کو استعمال کرنے سے روکا جا سکے۔
