والڈ سٹی آف لاہور اتھارٹی کی جانب سے اندرون شہر لاہور کی تاریخی حویلیوں کا ٹور منعقد کیا گیا۔
والڈ سٹی آف لاہور اتھارٹی کی جانب سے اندرون شہر لاہور کی تاریخی حویلیوں کا ٹور منعقد کیا گیا۔
5 جنوری ( قومی وقار )
والڈ سٹی آف لاہور اتھارٹی کی جانب سے اندرون لاہور کی قدیم حویلیوں کا ایک گائیڈڈ ٹور منعقد کیا گیا۔ اس ٹور میں مبارک حویلی، حویلی واجد علی شاہ، پاپڑ منڈی بازار، نوری بلڈنگ، حویلی نونہال سنگھ، نقش سکول آف آرٹس، فقیر خانہ میوزیم، حویلی اویس میر اور حویلی بارود خانہ کا ٹور شامل تھا۔ مزید برآں، سیاحوں کو رنگیلا رکشہ رائڈ اور ثقافتی پرفارمنسز سے بھی لطف اندوز کیا گیا۔ اس ٹور میں 150 سیاحوں نے شرکت کی۔ دن بہ دن اس ٹور کی شہرت میں اضافہ کے ساتھ سیاحوں کی تعداد میں اضافہ ہو رہا ہے۔ یہ ٹور مہینہ میں ایک بار منعقد کیا جاتا ہے۔ تمام سیاحوں کے لیے ریفریشمنٹ کا بھی انتظام کیا گیا اور سیاحوں کی جانب سے اس گائیڈڈ ٹور کے متعلق مثبت رائے کا اظہار کیا گیا۔
اصغر حسین، ڈپٹی ڈائریکٹر سیاحت، والڈ سٹی آف لاہور اتھارٹی، نے کہا، "اندرون لاہور کی قدیم حویلیاں شہر کی تعمیراتی وراثت کا ایک اہم حصہ ہیں۔ یہ نہ صرف قدیم تعمیرات کا منظر پیش کرتی ہیں بلکہ ماضی کے طرزِ زندگی کی جھلک بھی دکھاتی ہیں۔ ان تاریخی مقامات کا دورہ کرنا ایسا ہے جیسے وقت میں پیچھے جا کر دیکھنا کہ پرانے وقتوں میں لاہور میں لوگ کیسے رہتے اور معاشرتی ماحول کو اپناتے تھے۔ یہ دورے ان تعمیراتی بنیادوں کو بھی اجاگر کرتے ہیں جو عام لوگوں نے، نہ کہ صرف حکمرانوں یا افسران نے، قدیم شہر کی منفرد ساخت کی تشکیل کے لیے رکھی تھیں۔ اس وژن کے ساتھ، والڈ سٹی آف لاہور اتھارٹی اس ثقافتی ورثے کو منانے اور عوام کے سامنے پیش کرنے کے لیے پرعزم ہے۔
کامران لاشاری، ڈائریکٹر جنرل، والڈ سٹی آف لاہور اتھارٹی، نے بھی اس گائیڈڈ ٹور پر اپنی رائے کا اظہار کیا۔ ان کا کہنا تھا، "لاہور کے تاریخی مقامات پر آنے والے سیاح ہمیشہ اندرون لاہور کی قدیم حویلیوں کی معماری نزاکتوں سے متاثر رہے ہیں۔ مغلیہ، سکھ اور برطانوی ادوار کے دوران تعمیر کی گئی یہ حویلیاں مختلف تاریخی ادوار کے روایتی طرزِ زندگی، گلی محلوں کی ثقافت، اور معاشرتی پہلوؤں کی نمائندگی کرتی ہیں۔ والڈ سٹی آف لاہور اتھارٹی نے شہری ترقی اور جدیدیت کے باوجود اس ثقافتی ورثے کی حفاظت کے لیے نمایاں کوششیں کی ہیں۔ ٹور کو بہتر بنانے کے لیے اس میں ثقافتی پرفارمنسز بھی شامل کی گئی ہیں، جو سیاحوں کو کم قیمت پر ایک جامع اور با معنی ٹور کا موقع فراہم کرتے ہیں۔
