اسلام آباد کی ضلعی اور سیشن عدالت نے سابق صدر آصف علی زرداری کے خلاف ریمارکس سے متعلق کیس میں عوامی مسلم لیگ کے سربراہ شیخ رشید کی بعد از گرفتاری ضمانت کی درخواست منگل کو مسترد کر دی۔ اسلام آباد پولیس نے پی ٹی آئی کے اتحادی کو 2 فروری کو پیپلز پارٹی کی قیادت کے خلاف ہتک آمیز ریمارکس کرنے کے الزام میں گرفتار کیا تھا جس کے بعد عدالت نے پولیس کو ان کا دو روزہ جسمانی ریمانڈ منظور کیا تھا۔ جسمانی ریمانڈ مکمل ہونے پر اسلام آباد کی عدالت نے 4 فروری کو آبپارہ تھانے میں درج مقدمے میں شیخ رشید کو مزید جسمانی ریمانڈ کی درخواست مسترد کرتے ہوئے 14 روزہ جوڈیشل ریمانڈ پر بھیج دیا تھا۔ شیخ رشید نے عدالت میں بعد از گرفتاری ضمانت کی درخواست دائر کی تھی۔ انہوں نے اسلام آباد ہائی کورٹ سے بھی رجوع کیا تھا اور اس پر زور دیا تھا کہ وہ حکام کو ان کے سیاسی بیانات کی بنیاد پر ان کے خلاف نئے مقدمات درج کرنے سے روکے۔
