رکشہ ڈرائیور کی بیٹی نے میٹرک میں ٹاپ کرلیا
کامیابی کے لیے کوئی شارٹ کٹ نہیں ہوتا محنت اور کچھ سیکھنے کا جذبہ اگر ہو تو باآسانی کامیابی حاصل کی جاسکتی ہے چاہے آپ کا تعلق امیر یا پھر متوسط طبقے سے ہو۔
بھارتی میڈیا رپورٹس کے مطابق ریاست راجستھان کے شہر جے پور کے ایک رکشہ ڈرائیور کی بیٹی سوہانی نے میٹرک کے امتحانات میں 96 فیصد نمبر حاصل کرکے ٹاپ پوزیشن حاصل کرلی۔
سوہانی کی کہانی اس لیے نمایاں ہے کیونکہ اس کے والدین تعلیم یافتہ نہیں ہیں اور پورے خاندان کو کافی مالی مسائل کا سامنا ہے ان جدوجہد کے باوجود سوہانی کے والد نے اسے اسکول بھیجا۔
بھارتی میڈیا کے مطابق پندرہ سالہ سوہانی شکروال کے خاندان کی مالی حالت کبھی اچھی نہیں رہی یہ خاندان بھارت کے بی پی ایل زمرے میں آتا ہے اور کورونا وبائی مرض کے دوران جب پورا ملک لاک ڈاؤن کی زد میں تھا سوہانی کے خاندان نے بیٹی کی تعلیم جاری رکھنے کے لیے لوگوں کے کپڑے دھوئے۔
سی اے اور آئی اے ایس بننے کا خواب
سوہانی نے بورڈ کے امتحان میں اچھے نمبروں سے کامیابی حاصل کرنے کے بعد اس عزم کا اظہار کیا کہ وہ تعلیم مکمل کرکے آئی اے ایس آفیسر بننا چاہتی ہے۔
سوہانی کے والدین نے اپنی بیٹی کی کامیابی پر فخر اور خوشی کا اظہار کیا۔
اسکول کے پرنسپل دیویندر کمار واجا نے بھی اس کی تعریف کی اور کہا کہ وہ ہمیشہ پڑھائی میں بہت اچھی رہی ہیں اس کی استقامت کو سلام پیش کرتے ہیں۔
