والڈ سٹی آف لاہور اتھارٹی نے 5 نئے بحال شدہ تاریخی مقامات کے دورے کا اہتمام
والڈ سٹی آف لاہور اتھارٹی نے 5 نئے بحال شدہ تاریخی مقامات کے دورے کا اہتمام .
لاہور، 09 مارچ، والڈ سٹی آف لاہور اتھارٹی نے ایک خصوصی ہیریٹیج ٹور کا اہتمام کیا، جس میں شرکاء کو لاہور میں بحال شدہ اور جاری کاموں کو دیکھنے کا منفرد موقع فراہم کیا گیا۔ اس تقریب کا مقصد شہر کی بھرپور ثقافتی میراث کو محفوظ رکھنے کے لیے والڈ سٹی آف لاہور اتھارٹی کی جانب سے جاری اور مکمل تحفظ کی کوششوں سے متعارف کرانا تھا۔
ٹور کا آغاز ٹولنٹن مارکیٹ سے ہوا، جہاں 70 کے قریب تاریخ کے شائقین اور ثقافت سے محبت کرنے والے جمع تھے۔ یہاں سے سیاحوں کو جنرل الارڈ کے مقبرے تک لے جایاگیا، جو لاہور کے نوآبادیاتی ماضی کی ایک اہم باقیات ہے، اس کے بعد بریڈ لا ہال کا دورہ کیا گیا، جو لاہور کی سیاسی اور فکری تحریکوں سے گہرا تعلق رکھتا ہے۔ اس کے بعد، شرکاء نے انارکلی کے مقبرے کی سیر کی، جو کہ ایک فن تعمیر کا شاہکار ہے ۔
یہ دورہ شاندار طریقے سے وزیر خان باراداری پر اختتام پذیر ہوا، جہاں شرکاء کے لیے افطار ڈنر کا اہتمام کیا گیا۔
ڈائریکٹر جنرل والڈ سٹی آف لاہور اتھارٹی ، جناب کامران لاشاری، جو اس دورے میں بھی شامل تھے، نے لاہور کے تاریخی مقامات کے ساتھ عوامی شمولیت کو فروغ دینے کے لیے ایسے اقدامات کی اہمیت کو اجاگر کیا۔ انھوں نے کہا کہ یہ تاریخی عمارتیں ہماری وراثت کا ایک لازمی حصہ ہیں، اور ان کی بحالی کے ذریعے، ہمارا مقصد ماضی کی شان کو بحال کرنا ہے اور انہیں عوام کے لیے قابل رسائی بنانا ہے،”
اس تقریب نے زندگی کے مختلف شعبوں سے تعلق رکھنے والے لوگوں کو کامیابی کے ساتھ ایک پلیٹ فارم پر اکٹھا کیا تاکہ لاہور کے تعمیراتی اور ثقافتی ورثے کے تحفظ کےلیے والڈ سٹی اتھارٹی کی کاوشوں سے لوگوں کو آگاہی دی جا سکے ۔
