لاہور: پاکستان مسلم لیگ (ن) کی سینئر نائب صدر مریم نواز کی وطن واپسی کے پروگرام کو حتمی شکل دے دی گئی ہے اور ان کی آمد پر پارٹی کی تنظیم نو کے لیے ڈیڑھ ماہ کا شیڈول تیار کر لیا گیا ہے۔ اس پیشرفت سے باخبر ذرائع نے بتایا کہ مریم نواز وطن واپسی پر ایک پریس کانفرنس میں سیاسی ایکشن پلان کا اعلان کریں گی جب کہ تنظیمی دوروں میں صوبائی قیادت ان کے ساتھ ہوگی۔ ذرائع نے بتایا کہ پارٹی کے سابق وزیراعظم نواز شریف کی وطن واپسی کا اعلان تنظیمی دوروں کے اختتام کے بعد کیا جائے گا اور مسلم لیگ (ن) کے سینئر نائب صدر سابق وزیراعظم کی وطن واپسی کی تاریخ کا اعلان کریں گے ۔پارٹی ذرائع نے مزید بتایا کہ مسلم لیگ ن کی سیاسی طاقت کا باقی سیاسی جماعتوں کو بھی جلد پتہ چل جائے گا۔
