اسلام آباد: وفاقی دارالحکومت کی ایک بینکنگ عدالت نے جمعرات کو ممنوعہ فنڈنگ کیس میں پی ٹی آئی چیئرمین عمران خان کی عبوری ضمانت میں 31 جنوری تک توسیع کردی۔ بینکنگ کورٹ کی جج رخشندہ شاہین نے عمران خان کے وکیل اور اسپیشل پراسیکیوٹر رضوان عباسی کے دلائل سننے کے بعد محفوظ کیا گیا فیصلہ گزشتہ روز سنایا۔ عدالت نے پی ٹی آئی سربراہ کو آئندہ سماعت تک کیس میں حاضری سے استثنیٰ بھی دے دیا جب کہ عمران خان سے ان کی لاہور میں زمان پارک رہائش گاہ پر پوچھ گچھ کی اجازت دینے کی درخواست مسترد کر دی گئی۔ بینکنگ کورٹ نے سابق وزیراعظم کو کیس میں تفتیشی افسر کے سامنے پیش ہونے کا حکم دیا۔ جج نے یہ بھی ریمارکس دیئے کہ اگر مسٹر خان تحقیقات میں شامل ہونے میں ناکام رہے تو انہیں عبوری ضمانت دینے کا فیصلہ واپس کیوں نہ لیا جائے۔ سماعت کے دوران پراسیکیوٹر نے عدالت سے پی ٹی آئی کے سربراہ کی ضمانت منسوخ کرنے کا کہا کیونکہ وہ نومبر میں ہونے والے حملے کے بعد سے پارٹی کے سیاسی معاملات چلا رہے تھے لیکن وہ عدالت میں پیش ہونے اور تفتیش میں شامل ہونے سے گریزاں تھے۔
