اسلام آباد- دفتر خارجہ نے منگل کو ایک بیان میں کہا کہ تاجکستان کے صدر امام علی رحمان وزیراعظم شہباز شریف کی دعوت پر دو روزہ سرکاری دورے پر کل 14 دسمبر کو پاکستان پہنچیں گے۔ بیان میں کہا گیا ہے کہ امام علی رحمان کے دورے کے دوران، دونوں فریقین مختلف شعبوں میں دوطرفہ تعاون کو مزید مضبوط بنانے پر تبادلہ خیال کریں گے اور توقع ہے کہ متعدد دو طرفہ معاہدوں اور یادداشتوں یا مفاہمت پر دستخط کریں گے۔ جن معاہدوں پر دستخط کیے جانے کا امکان ہے ان میں ایک ٹرانزٹ ٹریڈ ایگریمنٹ بھی شامل ہے جس کی منظوری گزشتہ ہفتے وزارت تجارت کی سفارش پر کابینہ نے دی تھی۔ دفتر خارجہ نے کہا کہ تاجک صدر کے دورہ پاکستان سے دونوں ممالک کے درمیان مختلف شعبوں میں تعاون کو مزید گہرا کرنے اور بڑھتی ہوئی جیو اکنامک پارٹنرشپ کو مزید تقویت دینے کی امید ہے۔
