کوئٹہ- سپریم کورٹ کی جانب سے غیر ملکی کمپنی کے ساتھ نئے معاہدے کو قانونی قرار دینے کے چند روز بعد وزیراعلیٰ بلوچستان میر عبدالقدوس بزنجو نے منگل کو کہا کہ کسی کو بھی ریکوڈک منصوبے پر سیاست کرنے کی اجازت نہیں دی جائے گی۔ عبدالقدوس بزنجو نے میڈیا سے گفتگو میں واضح کیا کہ تانبے اور سونے کی کان کے منصوبے پر صوبائی ٹیکس بلوچستان کو جائے گا۔ انہوں نے اس عزم کا اظہار کیا کہ وہ آئین میں 18ویں ترمیم کے بعد صوبے کو دیے گئے اختیارات میں سے کسی کو نہیں دیں گے۔ 8 ارب ڈالر کی میگا غیر ملکی سرمایہ کاری سے نہ صرف قومی معیشت کو بحال کرنے میں مدد ملے گی بلکہ صوبائی معیشت پر بھی مثبت اثرات مرتب ہوں گے۔ انہوں نے یقین دلایا کہ کینیڈین کمپنی کے ساتھ ہونے والے معاہدے سے بلوچستان کو مالی فوائد حاصل ہوں گے۔ عبدالقدوس بزنجو نے کہا کہ ریکوڈک معاہدے سے قبل تمام اسٹیک ہولڈرز بشمول سیاسی جماعتوں کو آن بورڈ لیا گیا تھا۔ انہوں نے اس منصوبے کے بارے میں اپوزیشن کو مطمئن کرنے کے لیے کسی بھی حد تک جانے کا عہد کیا۔ گزشتہ ہفتے سپریم کورٹ نے ریکوڈک پراجیکٹ پر کینیڈین فرم اور پاکستانی حکومت کے درمیان نئے معاہدے کو قانونی قرار دیا۔ چیف جسٹس پاکستان جسٹس عمر عطا بندیال کی سربراہی میں جسٹس اعجاز الاحسن، جسٹس منیب اختر، جسٹس یحییٰ آفریدی اور جسٹس جمال خان مندوخیل پر مشتمل سپریم کورٹ کے پانچ رکنی بینچ نے صدر مملکت عارف علوی کی جانب سے بھیجے گئے ریفرنس پر اپنی رائے کا اظہار کیا۔ .
