پاکستان کی نوجوان تائیکوانڈو سنسنیشن عائشہ ایاز نے تھائی لینڈ میں جاری تائیکوانڈو انٹرنیشنل چیمپئن شپ میں سونے اور چاندی کے تمغے جیت لیئے ہیں۔
گیارہ سالہ عائشہ اب بین الاقوامی تائیکوانڈو مقابلوں میں دو طلائی، ایک چاندی اور ایک کانسی کا تمغہ جیتنے والی پہلی پاکستانی خاتون ایتھلیٹ بن گئی ہیں۔
عائشہ ایاز پاکستان کے باصلاحیت کھلاڑی اور کوچ ایاز نائیک کی صاحبزادی ہیں جنہوں نے اس ایونٹ میں ان کے کوچ کے طور پر بھی خدمات انجام دیں۔ انہوں نے ان تمام لوگوں کا شکریہ ادا کیا جنہوں نے نوجوان کھلاڑی کی حمایت کی، خاص طور پر پی ٹی ایف جن کے تعاون کے بغیر عائشہ کی تربیت ممکن نہیں تھی۔
انہوں نے کہا کہ اگر ہم اس عمر میں عائشہ جیسی اعلیٰ کارکردگی کا مظاہرہ کرنے والے بچوں کو سپورٹ کریں تو ہم بین الاقوامی سطح پر کھیلوں کے میدان میں ملک کا مزید وقار بڑھا سکتے ہیں۔
پاکستان تائیکوانڈو فیڈریشن (پی ٹی ایف) کے صدر لیفٹیننٹ کرنل وسیم احمد جنجوعہ اور سیکرٹری مرتضیٰ حسن بنگش نے نوجوان کھلاڑی کو شاندار جیت پر مبارکباد دیتے ہوئے کہا کہ عائشہ ملک کا اثاثہ ہیں اور وہ مستقبل میں ملک کا مزید سر فخر سے بلند کریں گی۔
