لاہور: وزیر اعظم شہباز شریف نے پاکستان مسلم لیگ نواز (پی ایم ایل این) کے سربراہ نواز شریف سے ٹیلی فونک گفتگو کی اور جمعے کو ان کی رہائش گاہ پر پارٹی کے سینئر رہنماؤں کے اجلاس کی صدارت بھی کی جس میں پنجاب کی موجودہ سیاسی صورتحال پر تبادلہ خیال کیا گیا۔ رانا ثناء اللہ نے ملاقات کے بعد نجی نیوز چینل سے گفتگو کرتے ہوئے کہا کہ پی ایم ایل این پنجاب میں 90 روز میں انتخابات کے لیے پوری طرح تیار ہے، اور صوبائی اسمبلی کے انتخابات میں کامیابی کے لیے پرامید ہیں۔ ذرائع کے مطابق نواز شریف نے وزیر اعظم شہباز شریف سے کہا کہ وہ گورنر پنجاب کو صوبے کی سیاسی صورتحال سے نمٹنے کے لیے ہدایات دیں۔ یہ پیشرفت وزیر اعلیٰ پنجاب چوہدری پرویز الٰہی کی جانب سے پنجاب اسمبلی تحلیل کرنے کی سمری پر دستخط کرنے کے ایک دن بعد ہوئی ہے۔ ذرائع کا کہنا ہے کہ شہباز شریف نے پارٹی رہنماؤں کو بتایا کہ نواز شریف اور پارٹی کی چیف آرگنائزر مریم نواز رواں ماہ جنوری میں وطن واپس آئیں گی۔ ذرائع کے مطابق یہ رہنما اپنی واپسی کے بعد انتخابی مہم میں بڑھ چڑھ کر حصہ لیں گے۔
