اسلام آباد: وزیر اعظم شہباز شریف منگل کو سکھر سے 306 کلومیٹر طویل سکھر حیدرآباد موٹروے (M-6) کا سنگ بنیاد رکھنے کے لیے سکھر روانہ ہوگئے۔ یہ پشاور کراچی موٹر وے کا آخری سیکشن ہے جس کے بعد پاکستان کے تمام بڑے اور اہم شہر موٹر ویز کے ذریعے منسلک ہو جائیں گے۔ یہ منصوبہ پبلک پرائیویٹ پارٹنرشپ کے تحت 30 ماہ کی قلیل مدت میں مکمل کیا جائے گا۔ وزیر اعظم شہباز شریف سکھر اور حیدر آباد میں تقریبات میں شرکت کریں گے اور اس موقع پر خطاب بھی کریں گے۔ دریں اثناء وفاقی وزیر اطلاعات مریم اورنگزیب نے کہا کہ سکھر حیدرآباد موٹروے کا سنگ بنیاد سابق وزیراعظم نواز شریف کے پورے ملک کو موٹرویز کے ذریعے ملانے کے خواب کی تکمیل کی جانب ایک اہم پیشرفت ہے۔ منگل کو ایک بیان میں انہوں نے کہا کہ اس منصوبے کی تکمیل سے لوگوں کو جدید، آرام دہ اور تیز رفتار سفری سہولیات میسر آئیں گی۔ حادثات سے بچنے کے ساتھ ساتھ جی ٹی روڈ پر ٹریفک کا دباؤ بھی کم ہو گا۔ انہوں نے کہا کہ اس منصوبے کی تکمیل سے ملک میں معاشی سرگرمیوں میں تیزی آئے گی اور تاجروں، صنعت کاروں اور کسانوں کو اپنی مصنوعات کی نقل و حمل میں بڑی سہولت ملے گی۔
