اسلام آباد ہائی کورٹ (آئی ایچ سی) نے بدھ کو مسلم لیگ (ن) کے رہنما اور وزیر منصوبہ بندی احسن اقبال کو نارووال اسپورٹس سٹی (این ایس سی) ریفرنس میں بری کردیا۔
اسلام آباد ہائی کورٹ کے چیف جسٹس اطہر من اللہ کی سربراہی میں دو رکنی بینچ نے احسن اقبال کی جانب سے دائر بریت کی درخواست پر فیصلہ سنایا۔
نومبر 2020 میں دائر ریفرنس میں قومی احتساب بیورو (نیب) نے احسن اقبال پر الزام عائد کیا تھا کہ انہوں نے اپنے حلقے میں صوبائی حکومت کے ایک منصوبے نارووال اسپورٹس سٹی کو فنڈز دے کر اختیارات کا غلط استعمال کیا اور اس کا دائرہ غیر قانونی طور پر 34.75 ملین روپے سے بڑھا کر 3 ارب روپے کر دیا۔
انہوں نے الزام سے بے قصور ہونے کی استدعا کی لیکن نیب نے ان پر الزام لگایا کہ انہوں نے مسلم لیگ (ن) کی حکومت کے دوران وزیر منصوبہ بندی اور ترقی کے عہدے کا غلط استعمال کرتے ہوئے اپنے حلقے میں پروجیکٹ شروع کیا۔ اسے منصوبے کی لاگت میں اضافے کے الزام کا بھی سامنا کرنا پڑا۔
اپریل میں احسن اقبال نے ضابطہ فوجداری کے سیکشن 265-K کے تحت اسلام آباد ہائی کورٹ میں درخواست دائر کی جس میں کہا گیا کہ آئین کا آرٹیکل 164 وفاقی حکومت کو صوبائی حکومتوں کے منصوبوں کے لیے فنڈ دینے کی اجازت دیتا ہے۔
انہوں نے کہا تھا کہ نارووال سپورٹس سٹی پراجیکٹ کو وفاقی حکومت کی جانب سے باضابطہ منظوری دینے کے بعد عمل میں لایا گیا۔ یہ الزام لگاتے ہوئے کہ نیب نے ان کے خلاف ریفرنس اس وقت کے حکمران پی ٹی آئی کی سیاسی مخالفین کو نشانہ بنانے کی مہم کے ایک حصے کے طور پر دائر کیا تھا،احسن اقبال نے ہائی کورٹ سے ریفرنس کو منسوخ کرنے کی درخواست کی تھی۔
