اسلام آباد: ملک کی نازک سیاسی صورتحال کے درمیان حکمران اتحاد میں پہلی بار کچھ دراڑیں اس وقت نمودار ہوئیں جب دو اتحادی جماعتوں نے بلوچستان میں ریکوڈک تانبے اور سونے کی کان کے منصوبے کی بحالی سے متعلق متنازعہ بل پر وفاقی کابینہ کے اجلاس کا بائیکاٹ کیا۔ وزیر اعظم شہباز شریف کی زیر صدارت ہونے والے کابینہ کے اجلاس سے باخبر ذرائع نے بتایا کہ دو اتحادیوں جمعیت علمائے اسلام اور بلوچستان نیشنل پارٹی مینگل نے احتجاج ریکارڈ کرانے کے لیے اجلاس کا بائیکاٹ کیا تاہم بعد میں اس میں شامل ہو گئے۔ صورتحال کی سنگینی کو محسوس کرتے ہوئے، وزیر اعظم نے جے یو آئی-ایف اور بی این پی-ایم کی شکایات دور کرنے کے لیے کابینہ کمیٹی تشکیل دی اور یہ یقین دہانی کرائی کہ دونوں اتحادیوں سے مشاورت کے بعد جلد ہی ایک ترمیمی بل پارلیمنٹ میں پیش کیا جائے گا۔ ناراض جماعتوں کا موقف تھا کہ سینیٹ میں حال ہی میں منظور ہونے والا ریکوڈک سے متعلق بل یعنی غیر ملکی سرمایہ کاری بل 2022 بلوچستان کے عوام کے حقوق کے خلاف ہے اور اس کی تیاری کے دوران دونوں جماعتوں کو آن بورڈ نہیں لیا گیا۔
