کراچی: کراچی اور صوبے کے دیگر حصوں میں ڈینگی بخار کے کیسز میں خطرناک حد تک اضافے کے بعد سندھ حکومت نے بدھ کے روز مختلف اسپتالوں میں 44 خصوصی وارڈز کو مریضوں کی بڑھتی ہوئی تعداد کے علاج کے لیے مختص کردیا۔ بدھ کو محکمہ صحت سندھ نے بتایا کہ صوبے میں مچھروں سے پھیلنے والی بیماری کے لیے مزید 323 افراد کا ٹیسٹ مثبت آیا ہے اور صرف کراچی میں نئے کیسز کی تعداد 261 ہے۔ رواں ماہ کے دوران شہر میں مریضوں کی کل تعداد 3,546 تک پہنچ گئی۔ محکمہ صحت کے ضلع وار اعداد و شمار کے مطابق 261 نئے کیسز میں سے ضلع مشرقی میں 96، وسطی میں 44، کورنگی میں 25، جنوبی میں 73، غربی میں 6، ملیر میں 12 اور کیماڑی میں پانچ افراد مثبت آئے ہیں۔ گزشتہ 24 گھنٹوں کے دوران حیدرآباد سے ڈینگی بخار کے 51 کیس رپورٹ ہوئے۔
